Acts 9

Bulus Abuiye Ɓo Wowoyi Nya

1Amma Bulus ɓei gna ye wa wu a Yesu viyi, ntu cenu wa lo prist dnagmayi aba n Urushelima. 2Wo ɓei ye ntu ge ɓa dna egbe do n woi, ɓa g wo takarda ntu ge walo Dimashika wo wan a Yesu viyi ɓe cei n Urushelima.

3Shi wo ɓo wu vi n Dimashika yi, buzangna dnagmayi eshe kwa bmiya fi wo. 4Wa miya shi ekni wa wo ai yiwo, “Bulus, Bulus kniyi nu zhin hoi gami wahala?”

5Wa nya ge, “nka nu da ɓoa?” Begyehi kwa gna, “Omi, nu Yesu, n ho ga wo wahala nyi.”

6“Laka ha lo zhimi n ɓo gna ho nya miye.”

7Aza n ɓa ɓei gnisun n woi nyi ce a wo ɓa, to ɓa mi n nyaho da m, gama ɓa ɓo wo oza ɓeda amma to ɓa gye za m. 8– 9Shi wo ɓo laka la to wa wye ɓa ye wo kpe yam. A shi wo busi bwa shi shi nu wa lo Dimashika. Wa dna ɓo anyipyei ngun-ata to woi gye wyeba m, to woi gyi nyagyi m.

10Yesu viyi ho ɓo dna n Dimashika ai yi wo ge Hananiya. Dagayi wa da ɓo n woi ngye wo nuna n ge, “Hananiya,” wa gna mi gni nyi Dagayi.

11Dagayi wa gna wo ge, Lo zokwo tatayi, Ha lo Yahuda puwa, Bulus dna lo ɓo woi zhin aduwa. 12Mi ku wu wo n ruya ge, oza ɓelo wa kpe wo awye ya, a yi wo ge Hananiya.

13Hananiya wa gna ge, Dagayi mi ku aɓo nukwoyi wo n Bulus zhin lo na viyi n Urushelima mi. 14Yi ku wo shi wo ku aza wan n mwa fi n kurkuku, woi la izni gwo n na prist dnagmayi aba, ntu ge wa ga a Yesu viyi wahala, n tna edna n Dimashika ye.

15Amma Dagayi wa gna wo e, “lo ho zhin ɓo ma gna ho, gama Bulus zhin omi ʼza kni-kniyi nu ntu ge wa dami nabari n abye aba, n asu yi, na Israilayi vinya. 16N ɓa wu wo shi wo ɓa sin, wahala nsun ntu mi ɓo.”

17Sai Hananiya wa lo, wa to Bulus bwa wa gna wo, “Omi zado Bulus Yesu n wa wu ho wohin n zokwo nyi, wo na tnu mi ntu ge ha nu Zafun Gyi-gyi-yi, ha gwo wyeba gye njesun.”

18Nsai-sayi anya ɓa kaya ngye ashiwan gulu n Bulus awye, wa gwo wyeba gye a zhin wo batizma n sai-sayi. 19Wa gyi nyagyi wa bwa kala. Wa dna ɓo n gnisun n a Yesu viyi anyi-pyei fyewyi. 20Wa lo aduwa zhin ba, ntu ge wa da nabari manayi Yesu nya, n ge wo zhin Shekwoyi nugun nu.

21Ca wo aza, ɓa nya ge, ʼoza deye nu to ɓo zhin, woi ga a Yesu viyi wahalan, har woi ɓe Dimashika ntu ge, wo wan ɓa lo cei n Urushelima m?

22Bulus wa gyi abye n waʼazi yi sosai, har ma wa du a Yahudiyi n ɓa nyi n Damashika nyi, ngye shi wo daɓo tu n Yesu tukwo ge wo nu zhin Masihu.

23Safyewyi a Yahudiyi ɓa zhin shaula ntu ge ɓa wu wo. 24A ku ce gna Bulus ge aza zhi lo na bokunmi ɓai zan wo shin n sukwoyi n nyipyei ntu ge ɓa wu wo. 25Shi ɓa ɓei ku kpe, a Yesu viyi ho ɓa la wo dna n cekun n sukwoyi, ɓa gun kpe n garu ɓa ya wo shi n wun yi ebmi wa lo wo nya.

26Shi wo ɓo si Urushelima woi ye wa ye gu a Yesu viyi, amma ɓa wo wo ʼdna ʼdna ɓa gye ge wo zhin ɓa dabara nu wa wan ɓa. 27Nsayi Barnaba wa ɓe n Bulus yi n abara aba, wa wu ɓa ngye shi Bulus ɓo gye Dagayi, n nya yi n Dagayi ɓo gnawo. Wa wu ɓa njesun, waʼazi n wo zhin lo n iko yi ntu Yesu ɓo nyi. 28Nsayi ɓaye ɓa go wo, wa kunsun n aviyi cici. 29Wa zhin waʼazi n Yesu eye yi ntna edna. Amma a Yahudiyi n ɓa da Helleni bye, ɓa nu nwo ɓei naɓo n ɓai nyi, ɓa zhin shaula ntuge ɓa wu wo. 30Amma a Yesu viyi ɓa ku wo ɓa la wo ɓa lo woi n Kaisiariya ɓa tnu woi n Tarsusu owo ayi.

31Nsayi Ikklisiya kwa bwa lafiya n Yahudiya, Galili n Samariya yi kwa mwa n kalayi. Ɓai zan-zan dna n Dagayi dnawo, Zafun Gyi-gyi-yi woi ga a bugba fu.

Aɓo Wowoyi Ngun Aba

32Bitrus wa lo abai gbo-gbo woi ɓi ɓa gna har wasi a viyi aba n Lida. 33Wa gye ozaho a yiwo Aniyas nayi fifiyi da ntu n gado har aye nyimwa-nyimwa. 34Bitrus wa gna wo ge Aniyas Yesu Kristi la ho kagna, laka ha zan-zan, wa gwo kagna n sayi-sayi. 35Sai aza vinya n Lida ɓedo n Sharo yi ɓa ga gaiciya ngye shi ɓa gye Aniyas woi zan-zan.

36N Joppa nyikwoza ho dna ɓo n zhin viyi a yi wo Dokas ko Tabita woi bma aza zhin tun ɓa ga a sanyi ba. 37Dna sayi, nyasan wo, wa fi, owo anugundo ɓa nuwan fu wo ɓa wo pa ɓa wo ya dna n ʼnyakun she, kafin a bi wo. 38Amma ɓa wo ge Bitrus lo n Lida ɓa tnu wo ɓo. 39Ba lo n woi aba n ɓa ɓei woi dna. Anyigbayi ɓo fi ɓo nmwa ɓai ci bwi ɓawu wo anya n Tabita ɓei zhin woi ga ɓa. 40Bitrus wa ɓa kunya wa zhin aduwa, wa gna Dokas wo la kala, wa kpe awye ya wa gye Bitrus nu wa laka sase. 41Wa shi wo bwa wa laka wa yi a viyi ɓedo anyigbayi ɓa ɓe wa wo ga ɓa.

42Aza n mwa begye ɓa wo nabari ye, ɓa ku gaiciya ga. 43Bitrus wa sun sa dna n Joppa n Siman ʼpabmiyi puwa.